Posted: 05/22/2012 12:41 PM IST

అదుగో ఈగ... ఇదుగో ఈగ.. అంటూ ..సినిమా ప్రజలు ఈగ కోసం ఎదురుచూస్తున్నారు. ఆ ఈగ మాత్రం టాలీవుడ్ నుండి బయటకు రానంటుందట. ఇప్పుడు టాలీవుడ్ మొత్తం ఒకటే ఈగ గోల. ఈగ ఎందుకు బయటకు రావటంలేదో?  ఈగ ప్రజల ముందుకు రావటానికి ఎందుకు భయపడుతుంది? అసలు ఈగ వచ్చి వాలుతుందా ? లేదా? అనే ప్రశ్నలు  టాలీవుడ్ వాసుల గుసగుసలాడుకుంటున్నారు.

 ఈగలకు కొమ్ములొచ్చేశాయ్.. అందుకే తెగ మిడిసిపడిపోతున్నాయి. ఇవి ఇలా మిడిసిపడటానికి కారణం రాజమౌళి అని సరదాగా కొంతమంది జోకేస్తున్నారు. ఈగకు ఓ రేంజ్‌లో సీన్ ఇచ్చి రాజమౌళి ‘ఈగ’ చిత్రానికి దర్శకత్వం వహించిన విషయం విదితమే. చిన్న కీటకానికి పెద్ద బాధ్యత ఇచ్చారు కాబట్టే ‘ఈగ’లో సమ్‌థింగ్ ఉంటుందనే అంచనాలు నెలకొన్నాయి. నాని, సమంత, సుదీప్ కాంబినేషన్‌లో రూపొందిన ఈ చిత్రం భారీ ఎత్తున క్రేజ్‌ను సొంతం చేసుకుంది.

పెద్దలు మాత్రమే కాదు పిల్లలు కూడా ఈ చిత్రాన్ని ఎంజాయ్ చేయొచ్చని ప్రోమోస్ చూస్తే తెలుస్తోంది. ఎప్పుడెప్పుడు ఈ చిత్రం విడదలవుతుందా? అని ఎదురు చూస్తున్నవాళ్లు కూడా ఉన్నారు. ఈ నెల 30న ‘ఈగ’ని విడుదల చేయడానికి సన్నాహాలు చేస్తున్నామని ఆ మధ్య రాజమౌళి ట్విట్టర్‌లో పెట్టారు. కానీ, ‘విడుదల తేదీని మారుస్తున్నందుకు క్షమించమని కోరుతున్నాను’ అంటూ ట్విట్టర్‌లో మరో మెసేజ్ పోస్ట్ చేశారు రాజమౌళి.

దానికి గల కారణాన్ని రాజమౌళి చెబుతూ-సీజీ (కంప్యూటర్ గ్రాఫిక్స్)కి పట్టే సమయం గురించి తక్కువ అంచనా వేశాను. కానీ ఈ గ్రాఫిక్స్ వర్క్‌కి చాలా టైమ్ తీసుకుంటోంది. అందుకే విడుదల తేదీని వాయిదా వేశాం. ఇప్పటివరకు చేసిన సీజీ వర్క్ బాగా వచ్చింది. క్వాలిటీ చాలా బాగుంది. మిగిలిన సన్నివేశాలకు సంబంధించిన గ్రాఫిక్స్ కూడా ఇంతే క్వాలిటీగా ఉండేలా చేస్తున్నాం. ఈ చిత్రం విడుదలను వాయిదా వేసినందుకు బాధపడుతున్నాను. ఈ మెసేజ్ చూసి మీరూ నిరుత్సాహపడే ఉంటారు. అందుకే క్షమించమని కోరుతున్నాఅని చెప్పారు.